آی تیم و تولَک چه خَشهِ                   آدمِ لیش تیم ایکَشهِ

گایِ کُلهَ تو نیدی                         موره پِلَه تو نیدی ؟

هُو ایکُنه وَ گایَلِش                        اِیان وَ باش دومایلِش

شُل ایزَنِن قیامت                        با عشق و با شهامت

هَر پی که عاجزِش بی                    با کارِ واجبش بی

او اینِشَس سَرِ بُر                              بیلَ ایدا دَسِ کُر

نشون ایدا عروسِش                   هی باد ایکرد وَ پوسِش

کُر چندی هم فیس ایکنه                گُلالِشهَ خیس ایکنه

فکر ایکُنِه خَورریهِ                          ندونه فِرمون بَریِه

چَلتوکَلَه کیل ایکنه                         عَقدارشَ سیل ایکنه

دل وَ منهِ دِلش نبی                         وَ فکر آخرِش نبی

تیم و تولک ایوَرَس                          بِرِنجَلم اِیان وَدَس

شیربا برونی ایکنه                              بهیگِشَه نو ایکنه

هی تار و تُمبک ایکنه                      تِرات و جمبک ایکنه

                     هی ایکِنِش غدی غدی                         لِواسَلِ نو و مِدی

دُدَر دِیَه بدش نیا                         چه وَش بگُوی دِلِش نیا

سیل وَ مِری هم ایِکُنن                  خنده وَری غم ایکُنن

بِل ایکَنِن وَ دینِ یَک                    هی ایبویِن وَ گینِ یَک

غِر ایخَرِن وَ دوریَک                         زی ایبویِن وَ شوریَک

او دیَه ایسوزینشِه                     صَحاوِ نصف و نیمشه

صُوا ایبوی صَحاوِ مال                     بعدِش ایبوی پیایِ مال

شریک ایبویِن وَ غذا                             دِل ایدرارِن وَ عزا

نال ایکُنن وَ نیل هَم                        تیکه اینِن وَ چیلِ هَم

دوما بَرِش وَ مالِشون                      خَش ایبویِ وَ حالِشون

خدا توهم بِوینِشون                            کُری بِنِه وَ دینشون

 

« نال ایکن و نیل هم : یعنی تعارف دادن و تعریف کردن از همدیگر »